大撤退、英籍平權、建立新香港

信報獨眼新聞：核災恐慌「大撤退」非奇想

小弟認為，另建新香港嘅大撤退計劃，應該考慮重新實行嘅必要。小弟基於以下考慮，認為呢個大撤退計劃並非不能考慮：

1. 中國人嘅質素以至政局本身，己經去到潰爛地步，中共政權一旦大崩潰，就算有BNA 1981 Section 4B嘅計時炸彈條款，都可能係一場大人道災難，大量英、美、澳、紐、加籍僑民聚集嘅城市撤僑行動，結果只會係呢啲國家全部無可避免捲入中國嘅大崩潰，一發不可收拾。

2. 大亞灣、嶺澳等核電廠，全部都講唔上安全可言。

3. 中國外來移民，同香港本土居民嘅分歧去到難以解決地步，類似新馬分家前夕，一係二二八式甚至印尼排華式血腥衝突收場，一係中港分家，但中港分家明顯係不可能選項。

4. 現時大英帝國或歐盟都需要新移民同資金來源，而BN(O)嘅平權問題呢筆數遲早亦要找。依家找，好過人道大災難嚟至找。

小弟認為，大撤退方案，可以有幾個方法去做：

1. 適用大撤退方案，只適合現有資格持有BN(O)，或持有BN(O)人士嘅子女，或1997年憑香港關係取得BDTC人士及其親屬（如果無拎BN(O)、BC或BOC）。

2. 大撤退地點可以咁商定：

a. 英國代香港出面，同澳洲租借北領土地區港口城市，做法等同當年海峽殖民地政府，將聖誕島同科科斯群島轉交澳洲嘅做法，新香港主權暫歸英國，並列為歐盟一部分，直至公投決定前途。新香港主權暫歸澳洲嘅話，現有嘅BN(O)可以轉作澳洲公民身份。

b. 在英國本土劃出新港口城市讓香港人居住，屆時BN(O)將會平權，而新城市自治方式，可以比照北愛爾蘭、蘇格蘭模式。咁樣，英國本土就會重新得回與1997年前相若嘅第二大城市。

c. 歐盟出面喺摩洛哥現有西班牙屬土附近，再買港口城市，用嚟建立新香港，新香港主權暫歸英國，以直布羅陀模式加入歐盟，直至公投決定前途。問葡萄牙買領土，都可以考慮。

但對歐盟整體利益，可能b, c方案比較有著數。但無論如何，依家咩嘢方案都要諗，連《信報》都討論呢個大撤退問題果陣，查實大家應該諗到，走嘅時候可能好快會到。